«Син супер!» финалисты Минзәләдән бүләккә фатир алды

Минзәләдән НТВ каналында «Син супер!» тапшыруында катнашкан 14 яшьлек Данил Новиковның хыялы тормышка ашты. Ул бүләккә бер бүлмәле фатир һәм тавыш яздыру өчен җиһазлар алды.

«Районнан ноутбук бүләк ителәчәк, ә меценатлар аңа фатир сатып алдылар. Сату-алу килешүе төзелгән инде, Данил – торак милекчесе. Бу – шәһәр үзәгендәге бер бүлмәле фатир, ул укый торган мәктәптән ерак түгел. Тиздән ул өй туе үткәрәчәк», – дип хәбәр итте «Татар-информ» мәгълүмат агентлыгына Минзәлә муниципаль районы Советы аппараты җитәкчесе Эльвира Хәбибуллина.

Спикер билгеләп үткәнчә, бу җиңү алар өчен көтелмәгән хәл түгел.  Талантлы егет төрле конкурсларда катнашып, аларда берничә тапкыр җиңү яулаган инде. Егет әбисе һәм әбисенең әнисе белән шәхси йортта яши. Яңа фатирда тавыш яздыру студиясе җиһазланачак, моның өчен республика акчасына микшер сатып алынган инде.

«Алар 120 квадрат метр мәйданлы яхшы шәхси йортта яшиләр, Данилның анда үз бүлмәсе бар, алар үз хуҗалыгын тоталар.  Без яңа йортка күчүчеләргә ачкычны район башлыгы катнашында тантаналы шартларда  тапшырырга планлаштырабыз», – диде Хәбибуллина.

Даниланы әбисе үстерә – әнисе машинага тапталып үлгән, ә әтисе улы тормышында катнашмаган. Әби үзен баланы тәрбияләүгә генә түгел, ә аның талантын үстерүгә дә багышлаган. Тамашадагы чыгышын егет нәкъ менә аңа багышлады да. Чирекфиналда малай Киркоровның «Марина» җырын башкарды, ярымфиналда «Держи», ә финалда «В краю магнолий»ны.

Новиков призлы урын алмаса да, мактаулы  диплом һәм музыкаль белем бирү форумына чакыру алды. Шулай ук 18 яшькә кадәр аңа стипендия түләнәчәк. «Син супер!» проекты барышында аңа 15 яшь тулды.

Ата-ана тәрбиясеннән мәхрүм калган балалар өчен «Син супер» шоуның дүртенче сезон премьерасы сентябрь аенда узды. Анда 9 илдән – Россия, Украина, Беларусь, Грузия, Абхазия, Кыргызстан, Молдова, Әзербайҗан һәм Эстониядән 58 бала катнашты.