Игелек эшләргә ашык

5 сентябрьдән алып, 11енә кадәр Татарстан Республикасында "Игелек атнасы" ("Неделя добра") акциясе уза. Җиде көн дәвамында ярдәмгә мохтаҗ кешеләргә булышлык итүгә юнәлтелгән төрле чаралар уздыру планлаштырыла. Күп кенә күренекле татарстанлылар бу акциягә кушылды инде.

"Игелек атнасы" турындагы күркәм идеяне үзенең Instagram һәм "ВКонтакте" битләрендә "Татмедиа" генераль директоры Андрей Кузьмин яклап чыкты.

"Татмедиа" акционерлык җәмгыяте оештырган акциянең максаты - бөтен республикага кеше кайгысына битараф булмаган, ярдәмгә мохтаҗларга булышлык итәргә әзер торган кешеләр турында сөйләү.

Яхшы яңалык белән уртаклашу өчен күп кирәк түгел - игелекле гамәл турындагы җентекле хәбәрне "Татар-информ" агентлыгы төркемендә "Предложить новость" кнопкасына басып, "ВКонтакте" (vk.com/tatarinform) социаль челтәренә җибәрергә кирәк. "Татар-информ" журналистлары республиканың әйдәп баручы агентлыгының төп битендә килгән хәбәрләрне бастырып чыгарачаклар.

Игелек эшләргә ашыгыгыз һәм бу турыда безгә хәбәр итегез. ә без, үз чиратыбызда, әлеге күркәм гамәл турында бөтен Татарстанга таратачакбыз.