Программада — 15 җирлек, 2,6 млн сум акча җыелган, республика 10 млн сумнан артык өстәячәк.
Бөгелмә районы башлыгы Дамир Фәттахов авыл җирлекләре җитәкчеләре белән киңәшмәдә хезмәттәшләре белән үзара салым программасының агымдагы статусы турында фикер алышты. Ул ассызыклаганча, программаның асылын дөрес аңлау мөһим: үзара салым — ул өстәмә җыем һәм йөкләмә түгел, ә конкрет проблемаларны үзебез хәл итү һәм моңа өстәмә акча җәлеп итү мөмкинлеге. Халык җыйган һәр сумга республика тагын 4 сум өсти.
Быел программада Бөгелмә районының 15 авыл җирлеге һәм 23 торак пункты катнаша. Халык 2,6 млн сумнан артык акча җыйган, ә республика аларга тагын 10 млн сум өстәячәк. Бу акчаларга юлларны һәм яктырткычларны ремонтлау, чишмәләрне һәм җәмәгать территорияләрен төзекләндерү, һәйкәлләрне һәм зиратларны тәртипкә китерү планлаштырыла.
Фәттахов билгеләп үткәнчә, халыкның җитәрлек мәгълүматлы булмавы аркасында программа мөмкинлекләре тулы күләмдә файдаланылмый. Хәзер киләсе елга программа формалаштыру бара, һәм халык белән бергә конкрет проектларны билгеләргә һәм бердәм реестр формалаштырырга кирәк.
Район башлыгы халыкны авыл җирлекләре башлыклары белән көнүзәк мәсьәләләр буенча фикер алышырга һәм программада активрак катнашырга өндәде. Ул шулай ук ачыклыкның мөһимлеген ассызыклады: һәр проект тәмамланганнан соң халык нәрсә эшләнгәнен, күпме акча салынганын һәм аларның нәрсәгә юнәлдерелгәнен күрергә тиеш.
