Кабакны яратырга кирәк

Кабак табигый шикәргә, С витаминына, каротинга, пектинга, органик тозларга, микроэлементларга бай. Аның составында – В төркемендәге витаминнарның тулы бер тупланмасы. Кабакта шулай ук итне яхшырак үзләштерергә ярдәм итә торган сирәк витамин – Т витамины да бар. Баллы булмаган сортлы кабакны кыргычтан чыгарып, кәтлитләргә, фаршка өстәсәң, алар сусыл, йомшак булыр һәм күпереп пешәр. Сүз уңаеннан, хәзер бик күпләр җәйгелеккә кабак мантыен әзерләп, туңдырып куялар. Җәйге эсселәрдә, эш күп чакларда – әзер ризык, тиз дә пешә, тәмле дә. Ит фаршына бәрәңге кушып ясаган кебек эшләнә, тик бәрәңге урынына ваклап туралган кабак кушасы.   

Бавыр һәм үт юллары авыру булса, кабакны чи килеш куллану файдалы. Иттарткычтан чыгарылган кабакка бал кушып ашасаң, ул организмдагы ташларны эретә.

Кабакның төшләре дә бик файдалы: алар ярдәмендә эчәклектәге паразитларны кудыралар, кабак төшеннән шулай ук атеросклероз, ашказаны, бавыр һәм үт юлы авыруларын дәвалый торган тыквеола препаратлары да ясыйлар.

Кабакны сөт һәм ярма белән кушып, ботка итеп пешереп; турап ашка салып; ярма һәм өрек, йөзем җимешләре белән кушып ясалган эчлек рәвешендә бәлеш итеп, яисә кыздырып ашарга мөмкин.