Аларның тарихы 1975 елда училище ишеге төбендә башлана.
Ирле-хатынлы Ильяс Мияссәр улы һәм Гөлйөзем Муллаәхмәт кызы Әхмәтгалимовлар 50 ел бергә гомер итәләр. Аларны юбилейлары белән Бөгелмә районы башлыгы урынбасары Фәнис Мөхәммәтов, шулай ук «Татэнергосбыт» предприятиесе һәм Көньяк-Көнчыгыш электр челтәрләре вәкилләре котлады.
Мәхәббәт тарихы 1975 елда Бөгелмә кооператив училищесы ишеге төбендә башлана. Армиядән кайткан Ильяс Гөлйөземгә игътибар итә, ә чыгарылыш кичәсеннән соң аңа тәкъдим ясый. 1976 елның августында туй ясыйлар. Озакламый кызы Илгизә һәм улы Гомәр туа.
Ильяс Мияссәр улы машина йөртүче булып хезмәт итә, аннары «Бөгелмә электр челтәрләрендә» эшли, шуннан лаеклы ялга чыга. Гөлйөзем Муллаәхмәт кызы сәламәтлек саклау идарәсендә, аннары электр челтәрләрендә һәм "Татэнергосбыт"та хисапчы булып эшли.
Бүген ир белән хатын — бәхетле әби һәм бабай, оныклары Даниил һәм Рөстәмне тәрбиялиләр, аларны тимераякта шуарга, нәрсәдер ясарга һәм аш-су әзерләргә өйрәтәләр.
