Бөгелмәләр ачыклый:Кайда дөреслек?

Гоголь урамының 39 нчы йортында яшәүчеләр, редакциябезгә шылтыратып, проблемаларын сөйләгәч, мин алар белән очрашырга махсус бардым. Машинадан төшүемә, соңгы таяныч күреп, халык уратып алды үземне.

-- Берүк булышыгыз, торак-комуналь хуҗалыгында безне ишетмиләр. Ел башыннан бирле подъездыбыз җыештырылмый, юылмый. Пычракка батып яшибез. Йортыбыз "Нефтяник" торак милекчеләре ширкәтенә керә, алар безгә хезмәт күрсәтә. Тик ничек дисезме? Менә - шулай. Счетны карагыз, акчасын өеп китергәннәр, ә подъездларыбыз сасы, шакшы. Бу ничек була инде? Без акчасын түләп барабыз, ә йорт подъездларына игътибар да бирмиләр, оятсызлар эшли бугай ул хуҗалыкта, -- ди Гоголь урамының 39 нчы йортында яшәүче Галина Киргизова.

-- Чыннан да, оятлары юк, инде ничәнче ай ишек янындагы подъезд идәнен үзем чыгып юам, менә хәзер шуның өчен 100 сум "премия" китергәннәр, -- дип шаяра, уенын-чынын кушып, 90 яшьлек Зәйтүнә апа. - Мин инде күптән подъезд юган өчен түләмим, квитанциямдә ул юлны махсус сызып куям. Идәнне үзем юам бит.

Подъездларга, чыннан да, керерлек түгел, тузанга, чүп-чарга баткан алар. Апаларның зарын аңларга була. Дөреслек эзләп, "Нефтяник" торак милекчеләре ширкәтенә шылтыратам. Телефонны баш инженер Анжела Стратилатова алды. Аңа халык зарын җиткергәч, ул фактларны ачып бирде:

-- Подъездларны җыештыручы бар. Узган атнада идән юылган анда, -- ди ул.

Кем кемне алдый торгандыр анысы әле ачык түгел, тик шунысы хак - йортта, подъездда тәртип юк.

Мин шылтыратып, әлеге мәсьәләгә ачыклык кертә башлагач, җыештыручы Гоголь урамының 39 нчыйортына да килеп җитте, идәннәрне юды.

-- Безгә җыештыручы итеп намуслы кешене куйсыннар иде, акча түләүдән дә баш тартмыйбыз, без чисталык яклы! - ди халык. Аларны ишетсеннәр иде.

Ә бу мәсьәләне без мобиль рәвештә контрольгә алдык, Гоголь урамында яшәүчеләр белән турыдан-туры элемтәдә торабыз.

Айгөл ШӘРӘФИЕВА.

Автор фотосы.