Полиция хезмәткәрләре чит кеше банк картасы белән түләгән хатын-кызны тоткарлаган

Россия Эчке эшләр министрлыгы Бөгелмә районы бүлегенең кизү частена җирле 39 яшьлек хатын-кыздан контактсыз түләү функциясе белән җиһазландырылган банк картасыннан акча урлау турында гариза кергән. Ул аны үз йортыннан ерак та түгел югалткан булган. Матди зыян 2 500 сум тәшкил иткән.

Оператив-эзләү чаралары барышында җинаятьчеләрне эзләү бүлеге хезмәткәрләре банк картасын 58 яшьлек пенсионер ханымның үз йорты янында табуын ачыклаган. Полицейскийлар ачыклаганча, хатын картадан файдаланырга булган һәм төрле азык-төлек кибетләрендә товар сатып алган.

Шикләнелүчегә карата җинаять эше кузгатылган. Хәзерге вакытта хатын-кызга карата шәһәрдән чыгып китмәү турында подписка рәвешендә кисәтү чарасы сайланган.

Россия Эчке эшләр министрлыгының Бөгелмә районы бүлеге матбугат хезмәте