Җирле драма театры директорын республика прокуратурасы таләбе буенча эштән чыгардылар

Татарстан Республикасы прокуратурасы йөкләмәсе буенча Бөгелмә шәһәр прокуратурасы «А. В. Баталов исемендәге Бөгелмә дәүләт рус драма театры» ТР ГАУК да коррупциягә каршы тору турындагы законнарның үтәлешен тикшерде. Тикшерү барышында директор әнисен эшкә урнаштыру, шулай ук аны башка хезмәткәрләргә түләүләр күләменнән артыграк бер тапкыр бирелә торган түләүләр белән бүләкләү факты ачыкланды.

Хокук бозулар ачыклану сәбәпле, республика прокуратурасы Татарстан Мәдәният министрына тәкъдимнәр юллады. Аның нәтиҗәләре буенча театр директоры Эльвира Сибгатуллина Челик ышанычны югалткан өчен эштән алынган.

Хатын-кызны тоткарлаганнар, суд аны тикшерү изоляторына җибәргән. Шикләнелүчегә алты елга кадәр ирегеннән мәхрүм итү яный. Тикшерү комитеты ике ел эшләү дәверендә законсыз рәвештә премияләр сыйфатында 700 мең сумнан артык акча күчерелгән дип саный.

Эльвира Сибгатуллина Челик театр директоры булып 2023 елда элеккеге җитәкчесе Владислав Юдин киткәннән соң эшли башлый, аңа каршы хезмәткәрләрне ялган эшкә урнаштыруда гаепләүләр белдерелде. Директор вазифаларын вакытлыча башкарырга элек тамашачыларны оештыру буенча директор урынбасары булып эшләгән Наталья Марковец билгеләнде.