Ике бөгелмәле чит кеше картасы белән спиртлы эчемлек сатып алганда росгвардиячеләргә эләккән

Ике бөгелмәле чит кеше картасы белән спиртлы эчемлек сатып алганда росгвардиячеләргә эләккән. Бу хакта «Татар-информ» мәгълүмат агентлыгына ТР буенча Росгвардия идарәсе матбугат хезмәтендә сөйләделәр.

Полициягә Бөгелмә шәһәрендә яшәүче 31 яшьлек хатын-кыз мөрәҗәгать итте. Хатын күптән түгел банк картасын югалтуы турында сөйләде. Аны югалтканын ул телефонга алкомаркет һәм тәмәке кибетеннән сатып алу турында смс-хәбәрләр килә башлагач кына белә. Шуннан соң банкка шылтыратып, картаны блокка куя.

Тәртип сакчылары зыян күрүчедән сатып алу турында соңгы смс-хәбәрнең кайсы кибеттән килүен ачыклыйлар һәм шунда юл тоталар. Видеокүзәтү камераларыннан язуларны караганнан соң, росгвардиячеләр фаразланган җинаятьчеләрнең шәхесләрен ачыклаган – яшь кешеләр кибетләрдән вак урлашу өчен хокук сакчыларының күз уңына элегрәк тә эләккән була инде.

Тиздән шикләнелүчеләрне тоткарлыйлар. Җирле 23 яшьлек ике кеше тулысынча үз гаепләрен таный һәм барысын да сөйләп бирә: алар картаны тимер юл вокзалы районында тапканнар һәм аның белән спиртлы эчемлек һәм тәмәке сатып алырга булганнар.

Егетләрне полиция бүлегенә китерәләр. «Урлашу» маддәсе буенча җинаять эше кузгату мәсьәләсе хәл ителә.