Бөгелмәдә танылган эшмәкәр Евгений Деданинны үтергәннәр

Бүген, көндезге сәгать икедә шәһәрдә танылган эшкуар Евгений Деданин атып үтерелгән. Эчке эшләр министрлыгы Бөгелмә районы бүлегеннән әлегә шәрехләр бирмәделәр.

Шаһитлар сүзләренчә, ир-ат сатып алучы кыяфәтендә, җитәкче офисына Деданин белән сөйләшергә килгән. Аннары аткан тавышлар ишетелә. Аннары ир кеше Самара номерлары белән булган автомобилендә качарга тырышып караган, ләкин офистан ерак китә алмаган, Нефтьчеләр урамында тоткарланган.

Һәлакәт урынында берьюлы берничә ведомствоның оператив төркемнәре эшли. Вакыйга урынына Бөгелмә прокуроры вазыйфаларын башкаручы Нияз Мисбахов та килгән. Үтерүдә шикләнелүче ир кеше тоткарланган, анда корал табылган.

Үтерелгән бизнесменның гәүдәсен суд экспертизасына моргка җибәргәннәр.

 Исегезгә төшерәбез, 2018 елның сентябрендә ике кораллы талаучы Деданинның йортына бәреп кергән иде. Йорт хуҗасын, аның хатынын һәм дустын бәйләп куялар.

Коттедж сигнализациягә тоташтырылган булганлыктан, җинаятьчеләр Деданинны аны өзәргә дип алып китә. Кулларын бәйләгән баулар йомшарып, эшкуар ул чакта богаудан ычкына алган, кухняга ташланган һәм пычак эләктереп, талаучыларга ташланган. Алынган җәрәхәтләреннән җинаятьчеләр үлә.

Ул чакта тикшерү барышында "Тиешле оборона чикләрен арттырганда кылынган үтерү" маддәсе буенча җинаять эше кузгатылган булып, соңрак ТР прокуратурасы аны законсыз дип санады һәм җинаять эше  ачу турындагы карарны гамәлдән чыгарды. Деданин йортына һөҗүмне оештыручы алты елга колониягә озатылды.