Бөгелмәлегә Бөек Җиңү юбилеена медаль тапшырдылар

Александр Бузанов Беларусь Республикасының Минск өлкәсе Толкочевичи авылында туган. 1941 елда 40 баланы Чиләбе өлкәсенең Карталы шәһәренә, балалар йортына эвакуациялиләр. Әнисе белән элемтә өзелә, ләкин Александр Михайлович һәрвакыт көтә һәм ул көн килеп җитәр, һәм алар бер-берсен табарлар дип өметләнә. Сугыш беткәч, алар әниләре белән очрашалар.

1961 елда Александр Михайлович булачак хатыны белән таныша. Аларның уллары туа. Чиләбе өлкәсеннән гаилә Бөгелмәгә күченә.
40 ел локомотив депосында эшләгән, аннан пенсиягә чыккан. Ул «Хезмәт ветераны» медале, Бөек Ватан сугышында Җиңү көне уңаеннан юбилей медальләре белән бүләкләнгән.

Россия Президенты Владимир Путин тарафыннан Сугыш ветераннары һәм тыл хезмәтчәннәренең каһарманлыгы хөрмәтенә булдырылган «1941–1945 еллардагы Бөек Ватан сугышында Җиңүгә 80 ел» медален Александр Михайлович Бузановка тапшырдылар. Чара тантаналы шартларда «Хәтер» сугышчан Дан залында узды. Бөгелмәлегә медальне Бөгелмә муниципаль районы башлыгы, шәһәр мэры Линар Закиров тапшырды.

Шулай ук Бөгелмә муниципаль районы Советы сессиясенең 2025 елның 6 февралендәге карары белән Бөек Ватан сугышында Җиңүнең 80 еллыгы уңаеннан һәм Ватан алдындагы зур хезмәтләре өчен Александр Михайловичка «Татарстан Республикасы Бөгелмә муниципаль районының Мактаулы гражданины» исеме бирелде. Ир-атка Бөгелмә гербы төшерелгән медаль тапшырылды.

Тантанада Александр Михайловичның туганнары, кадет мәктәбе укучылары, җирле хакимият, хәрби комиссариат, иҗтимагый оешмалар вәкилләре катнашты. Хезмәт ветеранына ныклы сәламәтлек һәм озын гомер теләделәр. Сугыш турындагы шигырьне җирле мәктәп укучысы укыды.

— Сез — безнең тере тарихыбыз, Сез — безнең байлыгыбыз, Сез — безнең горурлыгыбыз! Тормышыбызда нинди генә яңа сынаулар булмасын, илебез буыннан-буынга тапшырыла торган безнең өчен изге хәтер — диде тантананы алып баручы Рамил Габитов.