Күрәлмау вәхшилеккә сәбәп түгел

Бөгелмәдә, каршылык күрсәтә алмаганын белгән хәлдә, үлемгә сәбәп булырлык дәрәҗәдә итеп, кешенең сәламәтлегенә зур зыян китерүдә гаепләнүче 46 яшьлек иргә хөкем карары чыгарылды.
- Бөгелмә шәһәр прокуратурасы РФ Җинаять кодексының 111 нче маддәсе, 4 нче өлеше буенча җинаять кылуда гаепле дип табылган Илһам Кәримовны дәүләт гаепләвен яклап чыкты, - дип хәбәр итә Бөгелмә шәһәр прокуратурасы матбугат хезмәткәре Диана Юнысова.
2016 елның 20 октябрендә исерек хәлдәге ир-егет, үз карамагында булган өлкән яшьтәге карчыкны күрәлмау дәрәҗәсендә кызып, аяк-кулларына, башына суга, типкәләп ташлый. Ир кешенең вәхшилеге нәтиҗәсендә, башына зыян килү сәбәпле, имгәнүдән баш мие җилсенеп, әби дөнья куя.
Хөкем ителүче ир судта үз гаебен өлешчә таныды.
Хөкемдарлар аны 8 елга ирегеннән мәхрүм итү турында карар чыгарды. Бу вакытны ул кырыс режимлы төзәтү колониясендә уздырачак.
Хөкем карары әле үз көченә кермәгән.