Казанда тәртип бозган мотоциклчыларны ачыклау рейды узды

Мотоцикл, транспорт чарасы буларак, югары динамик характеристикалар, түбән тотрыклылык һәм пассив куркынычсызлык белән характерлана. Мотоцикл белән идарә итү, бигрәк тә югары тизлектә, аны йөртүченең үзенә дә, тирә-юньдәгеләр өчен дә куркыныч тудыра.

Агымдагы елда мотоциклчылар катнашында 8 юл-транспорт һәлакәте булган, аларда 1 кешенең гомере өзелгән һәм 9 кеше яраланган.

2020 елның 4 маенда Казан шәһәрендә «Стелс» мотоциклын йөртүче 62 яшьлек ир кеше тизлекне тиешеннән арттырып, «уңнан килгән каршылыкларны тикшерү» юл билгесе таләпләренә игътибар итмичә, бүлү полосасының бордюр ташына бәрелгән һәм мотоциклдан очып төшкән.  Нәтиҗәдә мотоцикл йөртүче алган тән җәрәхәтләреннән вакыйга урынында үлә.

Агымдагы елда мотопатрульләр тарафыннан 62 мотоцикл йөртүче административ җавапка тартылды, аларга карата 102 административ беркетмә төзелде, шул исәптән 3 материал – транспорт чаралары белән идарә итү хокукы булмаган затларга карата, 3 мотоцикл махсус саклау урынына урнаштырылды.

Татарстан Республикасы Эчке эшләр министрлыгының Дәүләт автоинспекциясе адресына тынычлыкны бозып йөрүче мототранспорт чараларыннан зарланулар еш килә. Кайбер транспорт хуҗалары мотоцикллар конструкциясенә кертелгән үзгәрешләрне исәпкә алмыйча, юл хәрәкәте иминлеген тәэмин итү өлкәсендә Россия Федерациясе законнары таләпләренә туры килми торган мотоцикллар белән идарә итәләр.

Дәүләт автоинспекциясе хезмәткәрләре тавыш дәрәҗәсен билгеләү өчен махсус прибор – шумомер кулланалар. Машина йөртүчеләр РФ Административ хокук бозулар турындагы кодексның 12.5нче маддәсенең 1нче өлеше буенча җавапка тартыла (төзек булмаган транспорт чарасы белән идарә итү, транспорт чараларына рөхсәт итү буенча төп нигезләмәләр нигезендә файдалану тыелган шартлар булганда), ул 500 сум күләмендә кисәтү яисә штраф салуны күздә тота.

Моннан тыш, тавыш дәрәҗәсе билгеләнгән нормалардан арткан өчен мотоцикл йөртүчеләре шулай ук кодексның 8.23нче маддәсе буенча җәлеп ителә («һаваны пычрата торган матдәләр микъдары  яки тавыш дәрәҗәсе нормадан артып киткән механик транспорт чараларын эксплуатацияләү») ул кисәтүне яки 500 сум күләмендә штрафны күздә тота.

Административ хокук бозулар турындагы эш буенча материаллар транспорт чарасын теркәүне туктату турында Карар кабул итү өчен Дәүләт автоинспекциясе бүлекчәләренә җибәрелә.

Транспорт чарасын алга таба эксплуатацияләү мөмкинлеге булмау белән бәйле күңелсез хәлләргә тарымас өчен, транспорт хуҗаларына мотоциклларының техник торышын регламентлаучы норматив-хокукый актлар таләпләрен үтәргә кирәк.

Дәүләт автоинспекциясе юл хәрәкәтендә катнашучыларның барысын да юл хәрәкәте кагыйдәләрен төгәл үтәргә чакыра!