Берләшергә кирәк, егетләр!

Петербург шәһәрендәге теракт нәтиҗәсендә

һәлак булган корбаннар истәлегенә багышлыйм.

Көнбатышта туплар тынганына

Җитмеш еллар узды байтактан.

Күңел тыныч түгел, явыз аваз

Яңгырар соң килеп кай яктан?

Тарих белә - күптән җир йөзендә

Иң көчлеләр бары без идек.

Сынатмадык утлы яу кырында,

Фашист өерләрен без җиңдек.

Оясында явыз дошманнарны

Дөмектереп кайткан без идек.

Ялкын бөрки тирә-ягыбызда.

Ник үзгәрде бездә кешелек?

Җир шарында, иң беренче булып,

Без иңләдек галәм киңлеген.

Тыныч булмаганга тормышыбыз,

Һәркемнең борчыла күңеле.

Карыймын да кайчак дөнясына,

Төрле уйлар килә күңелгә.

Кайнар каны тама сабыйларның,

Ана яше җиргә түгелә...

Тик җиңеп булыр бу афәтне,

Җыелышып бергә кузгалсак.

Иркен сулап куяр дөньялар да,

Канлы кулны бераз кыскартсак...

Үзгәрә бит тормыш җир йөзендә

Онытмагыз берүк сез аны:

Көтелмәгән җирдән янгын чыга,

Кара төтен баса дөньяны.

Нур сипкәндә кояш, өмет белән

Телибез бит күкнең аязын.

Көч азмыни безнең, бергәләшеп,

Туктатырга шартлау авазын?!

Ни булса да, "дөнья тыныч" дибез -

Күңелләрдә сүнми өметләр.

Кайда безнең хәзер Газинурдай,

Муса кебек батыр егетләр?!

Кан коела җирдә, гөнаһсыз кан.

Булмыйк, әйдә, куркак-җебекләр.

Киләчәктә илне саклар өчен

Берләшергә кирәк, егетләр!

Газинур ӘХМӘТҖАНОВ,
Теләче - Бөгелмә.