ТР Бизнес-омбудсмены Фәрит Габделганиев һәм Бөгелмә муниципаль районы башлыгы Линар Закиров эшмәкәрләр белән онлайн-очрашу үткәрделәр.

Чарада экспертлар сыйфатында “Роспотребнадзор”ның ТР идарәсе җитәкчесе Марина Трофимова, ТР авыл хуҗалыгы һәм азык-төлек министрының беренче урынбасары Наил Залаков, ТР сәнәгать һәм сәүдә министры урынбасары Герман Лернер, ТР Хезмәт, мәшгульлек һәм социаль яклау министры урынбасары Клара Таҗетдинова, ТР Төзелеш, архитектура һәм торак-коммуналь хуҗалык министрының беренче урынбасары Алексей Фролов, ТР Эшмәкәрлеккә ярдәм Фонды генераль директоры Айдар Салихов, ТР Фермерлар, крестьян хуҗалыклары һәм авыл хуҗалыгы кулланучылар кооперативлары ассоциациясе рәисе Камияр Байтемиров катнашты, дип хәбәр ителә ombudsmanbiz.tatarstan.ru сайтында.

Онлайн-очрашуны ачып, Фәрит Габделганиев ТР Дәүләт Советы сессиясендә эшмәкәрләргә ярдәм итү чараларының яңа исемлеген тәкъдим итәргә планлаштырылуын хәбәр итте.

«Бу хәл аеруча зыян күргән тармаклар исемлегеннән эшкуарларга да, калганнар өчен дә хәлне җиңеләйтәчәк, чөнки без теге яки бу дәрәҗәдә барысы да зыян күргән дип саныйбыз», – дип ассызыклады бизнес-омбудсмен.

Бөгелмә муниципаль районы башлыгы Линар Закиров хәбәр иткәнчә, районда 4500 кече һәм урта эшмәкәрлек субъекты теркәлгән, шул исәптән – 700 дән артык кече һәм микропредприятие, 2200 шәхси эшмәкәр, 14 урта бизнес предприятиесе һәм 1500 гә якын үзмәшгульлек. «Аларның күбесе эшләми, бу район икътисады үсешен акрынайта», - диде ул.

Онлайн-очрашу вакытында экспертлар эшкуарларның төрле темаларга кагылышлы күпсанлы сорауларына җавап бирделәр. Әйтик, «Батыр» пекарнясы директоры Эмиль Хаков пекарняны ташламалы бәядән он белән тәэмин итүне сорады.

Татарстан Республикасы Авыл хуҗалыгы һәм азык-төлек министрының беренче урынбасары Наил Залаков, чыннан да, быел онга бәяләр сизелерлек арта, дип раслады. «Социаль ипигә бәяләр үсүгә юл куймас өчен, Авыл хуҗалыгы министрлыгы нәкъ менә шундый икмәк җитештерү өчен 3 сумнан дотация бирә. Без бәяләрнең тагын да ныграк артуын аңлыйбыз, шуңа күрә бу сумманы 4,5 сумга кадәр күтәрергә тырышабыз», – дип хәбәр итте ул, икмәк пешерүчеләргә ярдәм сорап, турыдан-туры Татарстан Республикасы Авыл хуҗалыгы һәм азык-төлек министрлыгына мөрәҗәгать итәргә тәкъдим итте.

Шәхси эшмәкәр Наталья Булгакова карантин вакытында өйдә булганда, хезмәткәрләрнең хезмәт хакын түләүгә киткән чыгымнарны компенсацияләү мөмкинлеге турында сорады. ТР Хезмәт, мәшгульлек һәм социаль яклау министры урынбасары Клара Таҗетдинова аңлатканча, бу ярдәм чарасы салым салынмый торган грант формасында салым хезмәте аша тормышка ашырылачак. Моның өчен Федераль салым хезмәтенә шәхси кабинет аша мөрәҗәгать итәргә кирәк булачак.

Яңа эш башлаучы фермер Евгений Бердников авыл хуҗалыгы техникасын лизингка ала алмавына зарланды, чөнки аның залогы юк, эшен узган ел гына башлаган. Татарстан Республикасы Авыл хуҗалыгы һәм азык-төлек министрының беренче урынбасары Наил Залаков искә төшергәнчә, 60/40 программасы эшен дәвам итә (өстәмә бәягә салымнан 40% ы техника сатып алганда субсидияләнәчәк). Моннан тыш, “Росагролизинг”та 1 елга түләүне кичектереп, документларны электрон рәвештә бирү тәртибендә «вируска каршы» ташламалы программа эшли башлады. Ул фермер үтенече буенча чара күрергә вәгъдә итте.

Эшмәкәр Сергей Яценко компьютер һәм кәрәзле телефоннарны ремонтлау буенча остаханәләрнең эше рөхсәт ителәме, дип сорады. Кулланучылар хокукларын яклау һәм кеше иминлеге өлкәсендә күзәтчелек федераль хезмәтенең ТР идарәсе җитәкчесе Марина Трофимова билгеләп үткәнчә, әлегә бу сорауга бер генә төрле җавап юк: РФ Президенты Указы нигезендә, кичектергесез ремонтны гамәлгә ашыручы оешмалар эшли ала, әмма мондый профильле оешмаларның кичектергесез ремонт категориясенә каравын билгеләргә кирәк. "Гомумән, кызыклы сорау һәм тормыш мәсьәләсе. Ата-аналар читтән торып эшләгәндә һәм балалар дистанцион укытуда вакытта,  компьютерлар һәм телефоннарны ремонтлауга ихтыяҗ арта", - дип ассызыклады Трофимова. Фәрит Габделганиев хәбәр иткәнчә, бу мәсьәләне ул шулай ук игътибарга алачак һәм атна дәвамында нәтиҗәләр турында хәбәр итәчәк. Шул ук вакытта ул эшкуарлардан Законны бозмаска, ә рәсми аңлатмаларны көтеп торуны үтенде.

Эшмәкәр Илдар Шәрәфетдинов та шундыйрак сорау бирде: халык арасында тәрәзәләрне һәм ишекләрне алыштыру буенча эшчәнлекне тормышка ашырып буламы? «Кешеләр үзләре тәрәзәләрне, ватылган пыяланы, җимерелгән фурнитураны алыштыра алмый. Гарантия очраклары һәм үтәлмәгән килешүләр белән нишләргә?» - дип сорады ул. Марина Трофимова шулай ук әлеге мәсьәләнең аерым каралырга тиешлеген әйтте-кайсы ремонтны кичектергесез дип санарга була?

Җиһаз җитештерүче Эдуард Шәрәфиев үз компаниясе стандарт булмаган җиһазларны клиентларга китереп бирә һәм аны урында монтажлый аламы, дип сорады. Онлайн-сату һәм китерү рөхсәт ителә, ә җыю беркайда да документларда язылмаган, димәк, килешү буенча тыелган, - дип җавап бирде “Роспотребнадзор” вәкиле.

«Дентмастер премиум» стоматология клиникасы һәм күппрофильле медицина үзәге хуҗасы Лилия Хәкимова стоматология клиникаларының иң зыян күргән тармаклар исемлегенә кертелүен искә төшерде. "Күппрофильле үзәкләр бу исемлеккә кертелмәгән, гәрчә алар зыянны азрак күрмәгән. Табыш 30%тан артык кимегән. Безнең үзәктә 30дан артык персонал, өч кредит түләргә кирәк», - дип билгеләп үтте ул һәм күппрофильле медицина үзәкләренә ярдәм итүләрен һәм аларны зыян күргән тармаклар исемлегенә кертүләрен сорап, РФ Хөкүмәтенә мөрәҗәгать итүләрен үтенде. ТР Бизнес-омбудсмены мондый мөрәҗәгатьләрнең, шул исәптән коллективларның, Татарстан хакимиятенә төрле медицина учреждениеләреннән килүен һәм хәзерге вакытта алар буенча эш баруын раслады. Кулланучылар хокукларын яклау һәм кеше иминлеге өлкәсендә күзәтчелек федераль хезмәтенең ТР буенча идарәсе җитәкчесе Марина Трофимова, ТР буенча Баш санитар табиб карары проекты әзерләнгән, анда медицина тикшерүләрен үткәрү өлешендә билгеле бер ташламалар язылган, дип өстәде. «Бүген-иртәгә ул имзаланыр дип көтәбез», - диде ул.

Эшмәкәрләргә мөрәҗәгать итеп, Линар Закиров аларга үзләренең гозерләре һәм проблемалары белән район хакимиятенең кайнар линиясенә (85594) 6-91-00) активрак мөрәҗәгать итәргә тәкъдим итте. Шулай ук эшмәкәрләр өчен «Бизнес Бөгелмә» телеграмма-каналы булдырылды.

Эшмәкәрләр белән беренче онлайн-очрашуны тәмамлап, ТР бизнес-омбудсмены Фәрит Габделганиев мондый очрашуларның башка районнар башлыклары белән берлектә дә оештырылачагын ассызыклады, чөнки апрель аенда ТР Президенты каршындагы эшмәкәрләр хокукларын яклау буенча вәкаләтле вәкилнең кайнар линиясенә (843) 203-29-08) килгән 4500 мөрәҗәгатьнең өчтән бере – республика районнарыннан.

Шылтыратуларга җавап бирүче юристлар мәсьәләне хәл итү буенча булган мөмкинлекләрне рус һәм татар телләрендә аңлаталар, ә кирәк очракта муниципаль хакимиятнең җирле органнары һәм контроль-күзәтчелек органнары белән элемтәгә керәләр һәм алар белән бергә килеп туган проблеманы урында хәл итәләр. Һәм күп кенә очракларда моны оператив рәвештә-1-2 сәгать эчендә башкарып була.

Шул ук вакытта Фәрит Габделганиев шулай ук кайнар линиягә Татарстанда эшләүче чит ил эшмәкәрләреннән мөрәҗәгатьләр килә башлады, дип хәбәр итте. «Аларга үз проблемалары турында инглиз телендә сөйләү җиңелрәк. Шуңа күрә хәзер без бу телдә дә консультацияләр бирәбез",-дип искәртте бизнес-омбудсмен.