Театр Бөгелмәнең 2 лицей укучыларын яктылыкка, нурга илтә...

Халыкка дәрсе гыйбрәттер театр, 
Күңелдә йоклаган дәртне уятыр.

Театр  яктылыкка –нурга илтә, 
Кире юлга җибәрми, уңга илтә.

Театр көлдерәдер, уйнатадыр, 
Тагы үткән гомерне уйлатадыр.

Күрерсең анда үз хәлең, көләрсең 
Көләрлек булса, булмаса, еларсың...

–  дип яза үзенең “Театр” дип исемләнгән шигырендә халыкның мәшһүр шагыйре Габдулла Тукай.

Бу юлларның дөреслегенә театр сәнгатен яраткан, анда үзләре катнашып караган кешеләр генә ихлас төшенер. Быел илдә Театр елы дип игълан ителде. Шул уңайдан, газета укучыларыбызны шәһәребезнең 2нче лицеенда укучы яшь артистлар белән таныштырасы килә.

Татар мәдәният үзәгендә эшләп килүче театр түгәрәгенә йөрүче 2нче лицей укучыларының уңышлары сөендерә. Бу эш дүртенче елын дәвам итә һәм матур нәтиҗәләр күрсәтә.

Быел 5нче сыйныф укучылары, шәхсән әйткәндә – Дилбәр Кадыйрова, Булат Шаһиев, Тимур Вәлиев, Дарина Меньшаева, Саимә Мәсәлимова, Александр Егоров, Айсель Ширинова катнашында драматург Илгиз Зәйниевнең “Кәҗә, сарык һәм башкалар” әкияте сәхнәгә куюда яхшы нәтиҗәләр күрсәтте. Пьесаның авторы Илгиз Зәйниев татар шагыйре Габдулла Тукайның “Кәҗә белән сарык” һәм башка әкиятләренә мөрәҗәгать иткән. Энергияләре ташып торган яшь артистлар башкаруындагы җырлы-биюле, музыкаль әкият балаларны да, тамашачыны да битараф калдырмады. Укучылар үзләренең иҗат җимешләрен рәхәтләнеп башка укучыларга, балалар бакчаларында тәрбияләнүче нәниләргә күрсәтеп, бик күп мактау сүзләре ишеттеләр. Татар мәдәният үзәгендә әлеге түгәрәк белән Фәния Нәҗип кызы Сухова җитәкчелек итә, укучыларны сәхнәгә әзерли.

Татар мәдәният үзәгендә 2нче лицей укучылары катнашында эшләп килүче театр түгәрәгенә 2014 елда нигез салына. Алар иң беренче “Кара урманның иске әкияте” дигән курчак театрын куялар. Татар мәдәният үзәге җитәкчесе Флюра ВӘхмәтвәлиевна Шәрипова бу әсәрне рус теленнән татарчага тәрҗемә итә. Беренче иҗат җимеше Бөгелмә районы мәктәпләрендә, балалар бакчаларында күрсәтелеп, һәркем тарафыннан бик җылы кабул ителә. Алга таба “Соңгы Шүрәле” әсәре шәһәр тамашачысына чыгарыла. Шулай ук “Мактанчык әтәч” әкияте сәхнәләштерелә. Театр төркеме 2016 елда хәтта “Иделкәем” бәйгесендә катнашып, республика күләмендә беренче урын ала. Һәрбер сәхнә әсәрен матур, төсләргә бай, зәвыклы итеп бизәүче рәссам, барлык декорация, костюмнар өчен җаваплы хезмәткәр – Эльвира Латыйпова һәм сәхнәгә куюда ярдәмгә килүче Флюра Шәрипованың да бу эштә өлешләре зур.

- Балалар түгәрәккә атнасына ике тапкыр – сишәмбе һәм пәнҗешәмбе көннәрендә киләләр. Кирәк чакта көн саен да чакырабыз. Рус балалары да бик теләп катнашалар. Дөрес әйтмәгән сүзләрен кайберсенең телефонына яздырам, шуннан кабатлап, матур итеп сөйләргә, сүзләрне дөрес әйтергә өйрәнәләр. Кирәк чакта кичләрен телефоннан да репетицияләр ясыйбыз. Иң беренче балаларны дөрес итеп татарча сөйләшергә өйрәтәбез. Аннан соң гына сәхнә осталыгына төшендерәбез. Нәтиҗәсе сөендерә. Быел бик күп әсәрләрне караганнан соң, Флюра Шәрипова белән Илгиз Зәйниевнең “Кәҗә, сарык һәм башкалар” нәни шаяруына тукталырга булдык. Ул үз эченә берничә әсәрне алган. Әсәрдә 7 укучы 10 кешелек рольне уйный. Балаларны түгәрәккә лицейның татар теле һәм әдәбияты укытучысы Гөлнара Нивмәтуллина оештырып алып килә. Татар теле укытучылары балаларны яхшылап әзерләп җибәрәләр. Нинди генә сорау килеп туса да, тиз арада милли мәсьәләләр буенча директор урынбасары Фәүзия Зәйнуллинага мөрәҗәгать итәбез. Килеп туган сораулар шунда ук чишелеш таба. Мондый коллектив, балалар белән эшләве дә рәхәт, – дип, уй-фикерләре белән уртаклаша остазлары Фәния апа Сухова.

Кечкенә артистларга яңа иҗади уңышлар телибез. Яктылыкка, нурга илтүче юлларда, киртәләргә очрамыйча, матур нәтиҗәләргә ирешергә язсын.