Бөгелмәнең үрнәк гаиләләре (+ФОТОЛАР)

Гаилә – җәмгыятьнең иң кечкенә һәм шул ук вакытта иң кирәкле бер күзәнәге. Аның төп бурычы – яшьли туган сөюне ахыргача саклап, ана сөте белән балаларга яхшы сыйфатлар сеңдереп, тәрбияле, белемле, хезмәтне һәм  туган илен сөйгән ул-кызлар тәрбияләү. Тату, бердәм, итагатьле гаилә – бәхетле гаилә, ди өлкәннәр. Хак сүзләр. Бары бер-береңне хөрмәтләү, бер-береңнең кадерен белү генә гаиләне тату һәм бөтен итә, балаларда яхшы сыйфатлар тәрбияли, аларны үз максатларына ирешүчән шәхесләр итеп үстерә. Бөгелмә районында шушы гади генә кагыйдәләрне тормыш девизы итеп алып, бергә матур гомер кичерүче Мәхсудә белән Салават Рәүповлар гаиләсе олысына да, кечесенә дә үрнәк булырлык.

Салават абый гомерен эчке эшләр органнарына багышлый. Өлкән тикшерүче булып эшли, майор исеменә лаек була. Лаеклы ялга чыккач, адвокатлык белән шөгыльләнә башлый. Күп кешеләргә юридик ярдәм күрсәтеп, булышлык итә. Бу өлкәдә дә аның уңышлары шактый зур. Мәсгудә ханым исә гомерен балаларны савыктыруга багышлый – 1991 елдан бирле балалар хастаханәсендә шәфкать туташы булып эшли.

Әлеге күркәм гаиләнең төп горурлыгы – өч уллары: игезәкләр – Айнур белән Илнур һәм кече уллары Илшат. Егетләр бүгенге көндә Бөгелмә, Татарстан, Россия, Европа күләмендә дан казанган асыл ташлар.

- Улларым кечекенәдән үк спортны үз иттеләр, төрле секцияләргә йөрделәр, шашка буенча да һәрвакытта диярлек беренчелекне алып килделәр, туризм юнәлешен дә бик яраттылар. Тора-бара Илнур белән Илшат авыр атлетика белән ныклап шөгыльләнә башладылар. Бу спорт төре буенча бик зур уңышларга ирештеләр. Аллага шөкер, Россия, Европа күләмендә уза торган ярышларда да алдынгы һәм призлы урыннар яулыйлар, – дип горурланып сөйли егетләрнең әтисе Салават Бариевич.

Егетләр өчесе дә башлангыч белемне шәһәребезнең 16нчы мәктәбендә алалар, әти-әниләре, үз телләрен онытмасыннар дип, алга таба аларны Һади Атласи исемендәге 14нче татар гимназиясенә бирәләр. Урта мәктәпне дә яхшы билгеләргә генә тәмамлап, уку йортының горурлыгы булып торалар. Бүгенге көндә дә фотолары гимназиянең Мактаулы укучылары стендында балкый.

Мәктәптән соң олы улларының берсе Айнур В.Г. Тимирясов исемендәге Казан инновация университеты көллиятенең юридик факультетын яхшы билгеләргә генә тәмамлап, армиягә китә. Хезмәтен тәмамлап кайткач, әлеге университетта югары белем алырга карар кыла, хәзер анда укуын дәвам итә. Бүгенге көндә полиция органнарында участок вәкаләтле вәкиле булып эшли. Офицер исеме алып, полициянең кече лейтенанты булган. Хезмәте катлаулы, авыр булуга да карамастан, эшен яратып, намус белән башкара.

Айнурның игезәк сыңары Илнур исә Әлмәтнең спорт көллиятен тәмамлаганнан соң, шулай ук, армиягә алына. Хәзерге вакытта хәрби хезмәткә чакырылыш кампаниясе баруын истә тотып шуны билгеләп үтәсе килә, егетләр өчесе дә ватан алдындагы бурычларын үтәүгә бик җитди карыйлар, өчесе дә мактаулы солдатлар булалар.

- Смоленскийның коры җир гаскәрләрендә хезмәт иттем. Армия яшүсмер егетләрдән чын ир тәрбияли, тормышны танып-белүгә ярдәм итә. Шуның өстенә, хезмәтен уңышлы башкарып кайтучыларга эшкә урнашуы да күпкә җиңелрәк, – дип, уй-кичерешләре белән уртаклаша Айнур.

Илнур авыр атлетика белән 14 яшендә шөгыльләнә башлый. 4 ел эчендә спорт мастеры кандидаты исемен алуга ирешә. Егет үткән атнада гына Владимир шәһәреннән кайткан. 16–21 апрель көннәрендә анда авыр атлетика буенча Россия беренчелеге үтә. Спортчы 55 килограммга кадәр гәүдә авырлыгы категориясендә чыгыш ясап, 3нче урынга лаек булып, Россиянең спорт мастеры исемен ала.  

Гомумән алганда, Илнурның спорт буенча 26 Грамота һәм Дипломы, Россия беренчелегендә, Татарстан Республикасы беренчелегендә, Россия яшьләренең җәйге спартакиадасында, Бөтенроссия ярышларында яуланган 31 медале бар.

Бүгенге көндә ул балалар һәм яшүсмерләр туризмы һәм экскурсиясе станциясендә өстәмә белем бирү педагогы булып хезмәт итә. Туризм белән шөгыльләнергә теләүче балалардан торган төркем белән эшли.

Илнур авыр атлетика белән шөгыльләнә башлап, бер ел үтүгә, кече энесе Илшат та абыйсының күрсәткечләре белән кызыксынып, аның сукмагыннан китә һәм бу өлкәдә бихисап уңышларга ирешә. Аның копилкасында – авыр атлетика буенча 54 Грамота һәм Диплом, 51 медаль, Россия, Татарстан, Идел буе федераль округы беренчелегендә, Россия спартакиадасында һәм башка Бөтенроссия ярышларында яуланган 29 кубок. Ул 2015 елда Екатеринбург шәһәрендә Россия чемпионы исеменә лаек булган, берничә тапкыр Татарстан Республикасы чемпионы исемен алган, Россиянең спорт мастеры булып тора.  Шуның өстенә, ул шашканы да үз итә. Бу спорт төре буенча да 18 Грамотага ия.

- Рәүповлар бик үзенчәлекле, тыйнак гаилә. “Буш башак өскә үрелә, тук башак аска иелә”, – дигән кебек, бу гаилә дә гомер буе хезмәттә. Әти-әниләре үзләре гаҗәеп тәртипле кешеләр, балаларын да шулай ук кешелекле, максатчан итеп тәрбияләделәр. Егетләр безнең күз алдында үстеләр. Башта – ишегалды, аннан – мәктәп, хәзер инде шәһәр, республика, Россия күрке булып яшиләр, – дип, үз фикерләрен җиткерделәр күршеләре, гаилә дуслары Миләүшә һәм Әсгать Закировлар.

Зур уңышларга ирешкән, күркәм холыкка ия Илшат әлеге язманы әзерләгән вакытта Казан шәһәренең өстенлекле Росгвардия полкында хәрби хезмәт үтә иде. Ул кичә – 25 апрель көнне хезмәтен тәмамлап, әти-әнисе, туганнары, якыннары янына кайтып төште.

- Улларыбыз кечкенәдән бер-берсе белән бик дус, тату булдылар, һәрвакыт бергә иделәр. Балалар бакчасында да, мәктәптә дә тәрбиячеләре, укытучылары аларны бик яраттылар. Әле дә аралашып яшиләр. Хәзер инде алар укуларын тәмамлап, һәрберсе үз юлларын таптылар, спортчы егетләребезнең теләкләре – киләчәктә “Юность” спорт комплексында тренер булып эшләү. Без аларга һәрбер башлангычларында уңышлар телибез. Яхшы киленнәр насыйп булып, үзләре кебек уңган-булган балалар үстереп, безгә дә оныкларга һәм барысының да уңышларына шатланып яшәргә язсын. Без һәрвакытта да кулдан килгәнчә ярдәм итәрбез, – ди әниләре Мәхсудә ханым.  

Менә шундый бөтен районга үрнәк булырлык дус, тату, ярдәмчел, максатчан гаиләләр, егетләр бар бездә. Аларга тагын да зур уңышлар, сәламәтлек, тыныч тормыш һәм бәхетле киләчәк теләп калабыз.

Афәрин, булдырасыз!

Ләйсән ЙОСЫПОВА.

Фотолар Әсгать Закировныкы һәм гаилә альбомыннан.