Бәетемне сиңа багышлыйм...
15 май көнне шәһәребез үзәк китапханәсенең татар әдәбияты һәм туган якны өйрәнү бүлегендә "Бәетемне сиңа багышладым..." дигән фольклор кичә узды.
Айсылу НУРЕТДИНОВА,
бүлек мөдире.
Чакырылган кунаклар: "Шифа" клубы әгъзалары, "Дуслык" ветераннар клубының "Мирас" ансамблендә катнашучылар башта мөнәҗәтләрнең һәм бәетләрнең тарихы, аларның халкыбыз мәдәниятендә, әдәбиятында тоткан урыны турында мәгълүмат тыңладылар, "Сак-Сок", "Сөембикә", "Йосыф-Зөләйха" бәетләренең эчтәлеге белән таныштылар. Алып баручының сүзләрен куәтләп, "Дуслык" клубы җитәкчесе Чәчкә апа Сәлимова тыңлаучыларга тагын бик күп кызыклы нәрсәләр сөйләде. "Мирас" башкаруында яңгыраган "Лә иләһы илләллаһ", "Әминә апа бәете", "Сак-Сок", "Сөембикә", "Әнкәйгә" һәм башка мөнәҗәтләр, бәетләр берәүне дә битараф калдырмады, һәркем йотлыгып тыңлады, тәэсирләнде.
"Шифа" клубы әгъзасы Бәдия апа Кәбирова чиккән сөлгеләр, тастымаллар, бәйләгән челтәр япмалар һәм шәлләр күргәзмәсе кичәгә ямь өстәде, халык җәүһәрләренең байлыгына өстәмә дәлил булды.
Ә инде әлеге темага багышланган китап күргәзмәсе кызыксынучыларга бу юнәлештә белемнәрен тулыландырырга мөмкинлек бирде.
Халкыбызның бай мирасы белән танышу, аны барлауга багышланган фольклор кичәсе түгәрәк табын янында чәй мәҗлесе белән тәмамланды.
Следите за самым важным и интересным в Telegram-каналеТатмедиа
