“Татмедиа”да ваклап сату 46 процентка арткан

Ел башыннан “Татмедиа” АҖ газета-журналларын ваклап сату 46 процентка арткан. Бу хакта “Татмедиа” АҖ генераль директоры Шамил Садыйков хәбәр итте.

“Бездә язылу институты зур, әмма без ваклап сатуга игътибар итәргә булдык”, – дип билгеләп үтте ул.

Дүрт айда “Татмедиа” АҖ 16,7 мең данә вакытлы матбугат басмасы саткан. Сатуларны сәүдә нокталарының санын, аларның танылуын, уңайлылыгын һәм якын-тирәдә урнашуын арттыру хисабына күтәрә алдык.

Моннан тыш, 1 июльдән “Татпотребсоюз” идарәсе белән Татарстанның автолавкаларында һәм авыл кибетләрендә “Татмедиа” АҖ басмаларын сату турында килешүгә ирешелде.

Республиканың ун авыл районында яшәүчеләр яратып өлгергән газета-журналларны якын-тирәдә урнашкан сәүдә нокталарында сатып ала алачак. “ТАТМЕДИА” АҖ филиаллары район редакцияләрендә, сәүдә нокталарында һәм кибетләрдә газеталарны уңышлы сата.