Татарстанда балык тоту тыела. Эләгүчеләр дә бар

Ул 15 июньгә кадәр дәвам итәчәк. Уылдык чәчү чорында полиция браконьер балыкчыларны аулаячак.

ДПС инспекторлары балык алып барырга мөмкин булган машиналарны туктатып тикшерәчәкләр. Балыкка тиешле документлар булмаса, ул законсыз тотылган дип табылачак. Республика елга-күлләрендә даими рейдлар уздырылачак.

Яр буе зоналарында һәм утрауларда полиция балык саклау һәм эшкәртү урыннарын, салкын һәм утлы корал, ятьмәләр эзләячәк.

Зәй районында полицейскийлар закон бозучыларны тоткарлаган да инде. Бер чит ил машинасы багажнигыннан 23 толстолобик табып алганнар. Балык яңа тотылган булган. Аңа бернинди документлар да булмаган. Шоферны браконьерлыкта гаепләп полиция бүлегенә китергәннәр.