Рөстәм Миңнеханов Ураза гаетенә багышланган намазда катнашты

Татарстан Президенты Рөстәм Миңнеханов Ураза гаетенә багышланган гыйбадәттә катнашты. Тантаналы вәгазь һәм намаз Казанның Галиев мәчетендә узды, дип хәбәр итә ТР Президенты матбугат хезмәте.

Чара Татарстан мөселманнары Диния нәзарәте мөфтие Камил хәзрәт Сәмигуллин катнашында узды, ул үзенең вәгазе вакытында ТР Президенты Рөстәм Миңнехановның Ураза бәйрәме уңаеннан мөрәҗәгатеннән өзекләр укыды.

"Кызганычка каршы, Рамазан аеның соңгы көннәре Казанда коточкыч җинаять белән тәмамланган, гаепсез балалар һәм мәктәп хезмәткәрләре аның корбаннары булган. Республика мөселманнары, православие динендәгеләр һәм башка дин вәкилләре белән беррәттән, һәлак булучылар турында тирән кайгыралар, Аллаһы Тәгаләдән аларның җаннарын тынычландыру һәм яралыларның тизрәк терелүе турында дога кылалар», — диде Камил хәзрәт Татарстан Президенты мөрәҗәгатеннән.

Моннан тыш, мөфти балаларга дөрес тәрбия бирүнең мөһимлеге, шулай ук Рамазан ае тәмамланганнан соң да изге гамәлләр кылу кирәклеге турында искә төшерде.