Наркотикларга каршы көрәш: төнге клублар ябылачак!

Татарстанда наркотиклар әйләнешен контрольдә тоту идарәсе җитәкчесе Фаяз Шабаев китергән мәгълүматларга караганда, 2015 елда Татарстанның хокук сакчылары барлыгы 1 тоннадан артык синтетик наркотикларны кулга төшерүгә ирешкән. Бу 2014 ел белән чагыштырганда 9 тапкырга (!) күбрәк.
- Соңгы дүрт елда синтетик наркотикларның 90 яңа төре табылды һәм әйләнештән алынды. 2015 елда полиция хезмәткәрләре республикага наркотиклар ташый торган 28 каналны ябуга иреште. Әфьюннең күп очракта җиңел машинада, поездда, почта һәм интернет аша кертелгәнлеге билгеле, - дип ассызыклады Фаяз Шабаев.
Клубларга контроль көчәя
Коллегиядә яшьләрне наркотиклардан саклау мәсьәләсенә аеруча зур игътибар бирелде. Фаяз Шабаев сүзләренә караганда, узган ел төнге клубларда наркотик кулланган өчен барлыгы 68 кеше административ җаваплылыкка тартылган.
- Билгеле булганча, төнге клублардагы тикшерүләрне без әлеге бина хуҗалары белән бергә үткәрәбез. Кызганыч, кайсыбер төнге клуб хуҗалары безгә ярдәм итүдән баш тарта, хәтта комачаулый да, - дип белдерде җитәкче.
Мәсәлән, узган елларда төнге клубларда наркотик матдәләр кулланучыларның барысы да бирегә күңел ачу өчен килгән затлар булган. Быел исә хокук сакчылары әфьюн кулланган хәлдәге клуб хезмәткәрләрен дә ачыклаган, хәтта. Бер клубта исә наркотик кулланган хәлдәге 27 кеше берьюлы тоткарланган. Төнге клубларның берсендә әфьюн саклаган өчен ди-дижейны кулга алганнар.
Бу күренеш Татарстан премьер-министры Илдар Халиковта зур ризасызлык уятты. Ул әлеге төнге клубларны ябарга кирәк, дип белдерде. Моның өчен Роспотребнадзор, Гадәттән тыш хәлләр министрлыгы һәм башка идарәчелекләр белән актив эшләү сорала.
- Миңа калса, Роспотребнадзор идарәсе вәкилләре тиешле карарны бик тиз кабул итәчәк. Әлеге төнге клубларны башта 30 көнгә, аннары инде бөтенләйгә ябып була. Моның өчен бер клубта наркотик кулланган хәлдәге 27 кеше ачыкланганны көтеп утырырга кирәк түгел. Бер очрак та җитә... - дип белдерде премьер-министр.
Укучы һәм студентларның һәрберсен тикшерергә
Илдар Халиков укучылар һәм студентларны наркотик куллану-кулланмауга тикшерү эшчәнлеген дә җайга салырга боерды. Аның фикеренчә, бу эш һаман да системалы рәвештә алып барылмый.
- Бу эшнең төгәл механизмнары булдырылмады әле. Мин бары тик бер нәрсәне генә аңламыйм: ни өчен әлеге тестны 100 процент дәрәҗәсендә уздырып булмый? Әгәр дә сыйныфта 32 бала булып, аларның бары тик 28енең генә әлеге тикшеренү аша узуы нәрсә турында сөйли? Миңа калса, бу, беренче чиратта, дөрес мәгълүматтан качу. Әлбәттә, барча укучы һәм студентларны да тикшереп бетереп булмаячак. Шулай да, сыйныф һәм төркемнәрдәге һәр яшь буын вәкиле әлеге тест аша узарга тиеш. Бу - мәҗбүри, - диде Илдар Халиков.