"Мин татарча сөйләшәм" концертының кунагы – Сәйдә Мөхәммәтҗанова

Иртәгә Казанда "Мин татарча сөйләшәм" унынчы юбилей акциясенә нәтиҗәләр чыгарыла һәм чараның гала-концерты уза.

Казанның Бауман урамында 15:00 сәгатьтә башланачак концерт-тамашада "Голос.Дети" проектында татарчта җырлавы һәм финалга узуы белән шаккатырган Сәйдә Мөхәммәтҗанова да катнашачак.

Сүз уңаеннан: "Мин татарча сөйләшәм" акциясе туган телебезне үстерү, аны бозучыларны бераз "чеметкәләү" өлкәсендә шактый кызыклы чаралар уздыра. Быел, мәсәлән, яшерен камера кулланып, социаль тәҗрибә дә үткәрелгән - 5 сәгать дәвамында шәһәр уртасында башкала кешеләренә татарча гына мөрәҗәгать итеп йөргәннәр. Нәтиҗәсе нинди дисезме? Шәһәрдәге 75 % халыкның татарча аз булса да аңлавы ачыкланган. Ләкин ике кешенең берсе генә татарча җавап бирә алган.