Бөгелмәдә машина төзүчеләрне хөрмәтләделәр

Бөгелмә механика заводында Машина төзүчеләр Көненә багышланган тантаналы җыелыш узды. Бәйрәм чарасында предприятие хезмәткәрләренең өч буын вәкилләре катнашты.

Тантананы ачып, завод директоры Эдуард Валиков катнашучыларны Һөнәри дата белән котлады, намуслы хезмәте өчен һәр хезмәткәргә чын күңелдән рәхмәт сүзләрен җиткерде һәм сәламәтлек, һөнәри камилләшү һәм карьера үсеше теләде. Икътисади эшчәнлеккә йомгак ясап, ул предприятиене үстерү программасы ярдәмендә җитештерелгән продукция күләменең узган ел күрсәткечләренә карата 77 процентка артуын, ә хезмәт җитештерүчәнлегенең бер ярым тапкырга артуын билгеләп үтте. Коллективның хезмәт хакы уртача 22 процентка күтәрелгән.

Район башлыгы исеменнән машина төзүчеләргә котлауларны Бөгелмә шәһәре мэры урынбасары Ирина Белова җиткерде. Үз чыгышында ул шәһәрнең һәм заводның ныклы тарихи бәйләнешен, предприятиенең Бөгелмә муниципаль районының бөтен икътисадый комплексын заманча үстерүгә керткән зур өлешен ассызыклады, шулай ук ветераннарга — заводның алтын фондына рәхмәт белдерде, алар ярдәмендә предприятиенең куәтле җитештерү базасы булдырылды һәм бай традицияләргә нигез салынды.

Бу бәйрәм көнендә заводның 69 хезмәткәре Рәхмәт хатлары, Мактау грамоталары, «Татарстан нефтен эшкәртүнең 80 еллыгы уңаеннан» юбилей медальләре һәм Россия Нефть-газ төзелеше профсоюзының күкрәк билгеләре белән билгеләп үтелде.