Бөгелмә районына эш визиты белән Татарстан Халыклары ассамблеясе Советы Башкарма комитеты җитәкчесе килде

Эш визиты белән Бөгелмә муниципаль районында «Татарстан халыклары Ассамблеясе» РОО Советы Башкарма комитеты җитәкчесе Константин Яковлев булды. Аның белән бергә, Татарстан Республикасы үзбәкләре, таҗиклары, азәрбайҗаннары милли-мәдәни автономиясенең төбәк иҗтимагый оешмалары җитәкчеләре дә килде.

Халыклар дуслыгы китапханәсендә уртак эшчәнлек сыйфатын яхшырту һәм Татарстанда милли мәдәниятләр һәм традицияләр елына багышланган чаралар планын үтәү кысаларында, кайбер мәсьәләләрне хәл итү максатыннан түгәрәк өстәл узды.

Кереш сүз белән Бөгелмә муниципаль районы Башкарма комитеты җитәкчесенең социаль мәсьәләләр буенча урынбасары Ольга Плеханова чыгыш ясады, ул халыклар арасында тынычлыкны һәм татулыкны саклауның мөһимлеген һәм район территориясендә яшәүче халыкларның телен, традицияләрен һәм мәдәниятен саклауда һәм үстерүдә милли-мәдәни автономияләрнең эшенең ролен билгеләп үтте.

Түгәрәк өстәл эшендә Татарстан халыклары Ассамблеясының Бөгелмә муниципаль районындагы вәкиллеге җитәкчесе Рамил Габитов, Бөгелмә муниципаль районы Советы Аппаратының иҗтимагый оешмалар белән эшләү бүлеге башлыгы Ирина Төхвәтуллина, җирле милли-мәдәни автономияләр рәисләре катнашты.

«Бөгелмә муниципаль районында халыкларның үзенчәлеген, этномәдәни традицияләрен саклау һәм үстерү буенча зур эш алып барыла, үсеп килүче буын белән дуслык бәйләнешләрен ныгыту һәм үз халкының һәм башка милләтләрнең мәдәниятен хөрмәт итү буенча эшне дәвам итәргә кирәк», — дип билгеләп үтте Константин Яковлев.