Бөгелмә мөхтәсибәте командасы балык тоту буенча республика турнирында беренче урынны яулады

Азнакай районында ТР Мөселман яшьләре арасында йөзү һәм су төбендә балык тоту буенча турнир узды. Чара Татарстан Республикасында милли мәдәниятләр һәм традицияләр елына багышланган иде.

Балык тоту буенча ярышлар Азнакай районының Учаллы авылындагы буа ярында узды. Турнир инде алтынчы тапкыр Азнакай мөхтәсибәте көче белән үткәрелә.
Чарада ТР көньяк-көнчыгыш казые Марат хәзрәт Мәрданшин, Азнакай муниципаль районы аппараты җитәкчесе Айдар Хәлиуллин, район мөхтәсибләре һәм имамнары, шулай ук мәчет мәхәлләләре катнашты.

Турнирда республиканың ун районыннан 30 спортчы катнашты. Җиңүчеләрне тотылган балык саны буенча билгеләделәр. Бөгелмә үзәк мәчетенең имам-хатыйбы Баязит хәзрәт Раупов беренче урынны яулады. Ярышларда җиңүчеләр оештыручылардан дипломнар һәм призлар алдылар.