Бөгелмәнең «Ялкын» балалар һәм яшүсмерләр өчен социаль приютында " «Балаларга сугыш турында» дигән чара узды

     Күптән көтелгән һәм шатлыклы Җиңү бәйрәме алдыннан балалар Бөек Ватан сугышы ветераны Милинчук Виталий Антоновичны, “кадерле бабабызны»  кабул иттеләр.

      Очрашуда ветеран балаларга һәм ата-аналарга Венгрияне азат итү өчен сугышларның борылыш мизгелләрендә катнашу турында сөйләде. Малайлар һәм кызлар зур кызыксыну белән ветеранның орден-медальләрен карадылар. Бигрәк тә сугыш вакытында алынган медальләр бүгенге көнгә кадәр шундый хәвефле вакыйгаларның исен саклап калган кебек.

      Балалар, үз чиратында, җырлар җырладылар, солдатларның героик гамәлләре турында шигырьләр укыдылар. Бәхетле балачаклары, тыныч күк йөзе өчен рәхмәт йөзеннән чәчәкләр һәм открыткалар бүләк иттеләр.

     Оныклар үзләренең уртак бабалары белән горурлана, ул аларга чара ахырында киңәшләр бирде: «Эшләгез балалар! Хезмәттән курыкмагыз! Хезмәт кенә сезне чын кеше итә!»

Тәрбияче Энҗе Булатова

Фото: Кәримова Гөлнара