Каникулны – файда белән

Кышкы каникул көннәрендә Бөгелмә шәһәренең Үзәк мәчетендә балалар өчен “Сәлам” рухи-әхлакый курслары эшләде.  

Шәһәрнең төрле мәчетләрендә эшләүче хәзрәтләр, мөгаллимнәр уздырган дәресләргә һәр көнне утызлап бала йөрде. Аларга традицион ислам нигезләре, үз-үзеңне тоту әдәбе турында сөйләделәр. Быел беренче тапкыр бик кызыклы итеп сәнгать дәресләре дә керде. Укуның соңгы көнендә слаймнар белән эшләү буенча мастер-класслар уздырып, балаларны бик шатландырдылар. Исегезгә төшерәбез, слайм – балалар телендә “лизун” дип йөртелә торган ябышкан желесыман материалдан ясалган уенчыклар ул.

         Курсларга йөргән балалар каникулны бик файдалы һәм күңелле итеп үткәрделәр. Аларга бик ошады, язгы каникулда тагын очрашырга сүз куеп, таралыштылар.

Бөгелмә мөхтәсибәте матбугат хезмәте