Советлар Союзы Герое Газинур Гафиятуллинның музей-йорты хезмәткәрләре Әлмәттә

“Минем Туган ягым - Татарстан” дигән чара 3нче муниципаль бюджет мәктәпкәчә белем бирү учреждениесендә мәктәпкә әзерлек төркемнәрендәге балалар өчен үткәрелде.  Советлар Союзы Герое Газинур Гафиятуллинның музей-йорты турында слайдлар күрсәтү экскурсоводның күренекле якташыбызның батырлыгы турында сөйләве белән үрелеп барды. Кечкенә тамашачылар тарихны аеруча игътибар белән тыңладылар, сулышын тыңлап, музей экспонатлары, көнкүреш бүлмәләре һәм башка тарих предметларының рәсемнәре белән таныштылар. Балалар хис-кичерешләре белән уртаклаштылар, музейны тере күрү өчен Сугышлы авылына әти-әниләре белән килергә вәгъдә бирделәр.

Чыгышлардан соң балалар бакчасы мөдире Бөгелмә районыннан килгән кунакларга рәхмәт белдерде, балалар виртуаль экскурсияне кызыксыну һәм бик теләп карадылар, алып баручының сорауларына җавап бирделәр. Музей-йорт хезмәткәрләре, үз чиратында, тәрбиячеләргә балаларны чакырганнары һәм активлыклары өчен рәхмәт белдерделәр, чөнки мондый чаралар ярдәмендә Советлар Союзы Геройлары турындагы тарих туган авылларына гына түгел, аннан читтә дә буыннан-буынга тапшырыла.

Зәфирә Идиятуллина

Автор фотосы