Бөгелмәдә яшүсмер таксистка һөҗүм иткән

Бөгелмә полициясе таксисттан автомобиль урларга омтылган яшүсмерне тоткарлаган. Бу хакта ТР буенча Эчке эшләр министрлыгы матбугат хезмәте хәбәр итә.

Кичә төнлә ике иптәш егет төнге шәһәр буйлап йөрү өчен таксига заказ бирә. Таксист алар янына килгәч, бер яшүсмер машинаны үзе алып китәргә ниятләп, шоферның муенына ватык шешә башы белән суга. Мондый хәлне көтмәгән иптәше таксистны яклап чыга. Хәлнең үз файдасына булмавын бәяләп, егет качарга булган.

Такси йөртүчегә медицина ярдәме күрсәтелгән, ә яшүсмерне шул ук көнне полиция хезмәткәрләре тотканнар. Аңа “Талау” һәм “Кеше үтерергә омтылу” маддәләре буенча җинаять эше кузгатырга ниятлиләр.