Бөгелмәдә ике исерек дусны тоткарлаганнар, алар таксистка кадап, автомобильне яндырганнар

Бөгелмәдә ике исерек дусны тоткарлыйлар, алар таксистка кадап, автомобильне яндыралар. Бу хакта «Татар-информ» мәгълүмат агентлыгына үз чыганагыннан билгеле булды.

Агентлык чыганагы мәгълүматлары буенча, ике исерек яшь кеше күңел ачарга барыр өчен Азнакайдан Бөгелмәгә такси чакыртырга булалар. Шәһәргә килгәч, дуслар юл өчен акча түләргә теләмиләр һәм машина йөртүче белән ачуланышалар.

Ызгыш барышында таксистның аркасына пычак белән кадыйлар. Шуннан соң пассажирлар автомобильне йөртүчесе белән бергә яндырырга карар кылалар.

Янган машинаны шаһитларның берсе күреп алган. Килеп җиткән янгын сүндерүчеләр утны сүндергән. Автомобиль салонында таксистның гәүдәсе табылган.

Билгеле булганча, тиздән полицейскийлар дусларны тоткарлаган. Алар Азнакай һәм Чистай кешеләре булып чыккан. Берсенә – 23 яшь, икенчесенә – 25 яшь.