Кечкенә бөгелмәләр светофорга кунакка барганнар

Бөгелмә шәһәренең 21 нче "Энҗекәй" балалар бакчасында тәрбияләнүче нәниләр юл йөрү кагыйдәләрен ныклап өйрәнәләр. Бу эшнең кечкенәдән үк алып барылуы мөһим. 3-4 яшьлек балалар юл кагыйдәләрен яхшы белүләрен 9 апрель көнне күрсәттеләр. Балалар ата-аналары белән бергә җырлы-биюле тамашада, күңелле конкурсларда катнаштылар.

Биредәге уеннарда җиңеп чыгу өчен аларга юл билгеләрен дөрес таный белү кирәк булды. Юл хәрәкәте иминлеге дәүләт инспекциясеннән килгән кунаклар - инспекторлар Татьяна Баянова белән Гөлнара Гыйбадуллина балаларның осталыкларын, белемнәрен уңай бәяләделәр. Алар үзләре белән юл хәрәкәтенең нәни җәяүлеләренә күчтәнәчләр дә алып килгән иде.