"Энҗе бөртеге" бәйгесенә язмалар көтәбез

Хөрмәтле укучылар, урта һөнәри белем бирү йорты студентлары!

"Бөгелмә авазы" газетасында традицион "Энҗе бөртеге" бәйгесе дәвам итә. Быел аның темасы туган телебезгә бәйле - "Туган телем - назлы гөлем" дип атала. Соңгы арада телебез турындагы зур шау-шулар, татар теле дәресләрен кыскарту мәсьәләләренә бәйле булган сораулар бер генә милләтәшебезне дә битараф калдырмады. Шул рәвешле, сезнең дә бу мәсьәләгә мөнәсәбәтегезне, карашыгызны беләсебез килә. Язмаларыгызда телебезнең матурлыгын, мөһимлеген, аның ни дәрәҗәдә кирәклеген тасвирлый аласыз - барысы да сезнең фантазиягә бәйле.

Бәйгенең максаты: укучыларның матбугат чарасы белән элемтәсен ныгыту; мөстәкыйль эшләү күнекмәләрен арттыру; тел байлыгын һәм тасвирлап бирә белү сәләтен үстерү һәм, әлбәттә, туган телне саклау проблемаларына игътибарны юнәлтү.

Иҗади эшләр электрон вариантта да, язмача да кабул ителә. Яхшы дип табылганнары газета битендә урын алачак.

Вакыт бик аз калып бара, бәйгегә йомгак апрель аенда, Тукай туган көндә - Туган тел бәйрәмендә ясалачак.