«Дюймовочка» балалар бакчасында Муса Җәлилнең тууына 115 ел тулуга багышланган чара уздырдылар

15 февраль көнне 6нчы «Дюймовочка» балалар бакчасында Муса Җәлилнең тууына 115 ел тулуга багышланган бәйрәм чарасы узды. Ул, Габдулла Тукай кебек үк, туган республикабыз һәм илебездән читтә киң танылган шагыйрь.

Әлеге чарада өлкән һәм мәктәпкә әзерлек төркеме балалары актив катнашты. Балалар сәнгатьле итеп «Подъезддагы очрак», «Дару», «Яулык», «Кыз җыры» һ.б. шигырьләрне сөйләделәр. «Кызыл ромашка» һәм «Бала йокысы» шигырьләрен сәхнәләштереп күрсәттеләр.

Барлык балалар да бик тырыштылар, бигрәк тә өлкән төркемнән Айсинә Чигакова, Кирилл Шаталов, Валерия Рыбакова, Софья Сапугольцева, Валерия Литвинова, мәктәпкә әзерлек төркеменнән Полина Важнова һәм Оскар Хафизов аерым билгеләп үтелде.

Балалар шагыйрьнең һәр шигырен күңелләре аша үткәрде һәм Муса Җәлилнең батырлыгына сокландылар.