Республиканың матбугат кыры

Руслан ҖӘЛӘЕВ.
Автор фотосы.

Киңәйтелгән утырыш эшендә ТР Президенты Рөстәм Миңнеханов, ТР матбугат һәм массакүләм коммуникацияләр агентлыгы җитәкчесе Марат Моратов, ТР ДС Рәисе урынбасары, ТР Журналистлар берлеге рәисе Римма Ратникова, матбугат чаралары баш мөхәррирләре катнашты.

М.Моратов үзенең чыгышында республиканың матбугат кыры турында тулы тукталды. Узган ел Татарстанда барысы 1008 гаммәви матбугат чарасы эшчәнлек алып барган. Шуларның 683е - басма /461 газета һәм 204 журнал/, 198е - электрон /115 телепрограмма, 83 радиопрограмма/, 11е - мәгълүмат агентлыгы һәм 116сы - интернет мәгълүмат чарасы. Алда санап үтелгәннәрдән татар телендә 114 газета, 27 журнал, 25 телевидение һәм 23 радиопрограмма, 3 мәгълүмат агентлыгы, 52(!) интернет мәгълүмат чарасы /2010 елда берәү генә булган/ эшли. Бүгенге көнгә мәгълүмат кыры өлкәсендә эшләүчеләр саны 4705 кешене тәшкил итә. Агентлык җитәкчесе үзенең чыгышын интернет ресурсларның өстенлек итүе, әлеге өлкәнең тиз үсүе һәм боларны киләчәктә, әлбәттә, истә тотып эшләү кирәклеге турындагы мәгълүмат бе­лән тәмамлады.

ТР Журналистлар берлеге рәисе Р.Ратникова җыелганнарны, тулы итеп, журналистлар тормышы белән таныштырды. Татарстан журналистлары съездына әзерлек, гам­­­­мәви мәгълүмат чара­лары вәкилләренең җәм­­­­­­­гыятьтәге роле, хез­мәт­кәрләрнең хез­мәт хак­лары, гонорар мәсьәләсе, журналистлар хезмәтен югары бәяләү өчен махсус Дәүләт бүләген булдыру һәм көн кадагындагы башка мәсьәләләрне күтәрде.

"Татмедиа" ачык ак­цио­нерлык җәмгыяте ге­не­раль директоры Ай­­­дар Сәлимгәрәев хезмәт­тәшләренә үзе җитәкләгән оешмадагы хәлләр турында сөйләде. 2011 елда "Татмедиа" ААҖ урнашкан төп бинада төзәтү эшләренең барышына, җәм­­­­гыятькә керә торган матбугат чараларына да тукталды ул. Шул ук вакытта 2012 елга планнары белән дә уртаклашты.

Аннан соң чыгыш ясау­­­­чылар республикада һәм аннан читтә татар телендә чыга торган гаммәви мәгълүмат чараларын үстерү турында фикер алыштылар. Алар турында Әстерханнан килгән "Идел" газетасы мөхәррире Нәфисә Хәмидуллина мисаллар китереп сөйләде.
Киңәшмә эшенә йомгакны ТР Президенты Р.Миңнеханов ясады. Үзенең чыгышында ул басма һәм электрон матбугат чараларының бер-берсен тулыландыруына, киләчәктә басма мәгълүмат чараларының бетмәячәгенә, башка ил­­ләрнең әлеге этапны инде узуларына тукталды.

Илбашын журналистлар­ның һөнәри осталыгы мәсьәләсе аеруча борчый булып чыкты. Халыкка мәгълүмат җиткергәндә моның бик әһәмиятле икәнлеген әйтте Президент. Аннан соң төрле чыганаклардан алынган мәгълүматларны җе­н­­­­­текләп тикшергәч һәм анализлагач кы­­­на хакыйкатьне ачык­­­лап булуын да җиткерде.

Федераль үзәк тарафыннан Татарстаннан чит­тә яшәүче милләт­тәш­ләребез өчен татар теле даи­рә­­сен, гореф-гадәт­ләребезне үстерү өчен мөмкинлекләр тудырылма­вына ачы­­­­нуын белдерде. Шуңа ка­рамастан, татар телен сак­лау һәм үстерү өчен респуб­ликада яңадан-яңа программалар бул­­­­дыру максатын да куйды. Татарстан, аерым ал­­­ганда, Ка­зан белән кызыксыну­чыларның чит илләрдә күп булуын, 2013 елгы җәйге Универсиададан соң тагын да артачагын белдерде. Әлеге эштә, әлбәттә, республикадагы һәм аннан читтә эшләүче журналистларның үзләреннән зур өлеш кертәчәгенә ышаныч баглады. Ахырдан Р.Миңнеханов эшләрендә югары үрләр яулаган журналистларга бүләкләр тапшырды /рәсемдә/.

Очрашуда тагын бер әһәмиятле мәсьәләгә ачыклык кертелде: хаки­мияттән һәм аның эшеннән риза булмаучылар белән сөйләшүләр алып бару кирәклеге ассызыкланды.