Без –хәтерле

Яшәп булмый икән бу дөньяда
Хәтереңне җуеп, күз яшьләрең тыеп.
Авыр еллар хатирәсе калган
Кайгыларны җыеп, йөрәкләрне уеп.

Онытылмый һаман милләтемне
Мыскыл иткәннәре, аның үткәннәре.
Хәтеребездә, барсы хәтердә:
Динсез иткәннәре, Себер йөрткәннәре...

Явыз Иван кылган ачы кайгы
Мәңгелеккә сеңгән, милләтем бит түзгән!
Тагын күпме булыр бу сынаулар
Милләтемә килгән, динебезгә тигән?

Без - хәтерле, барын хәтерлибез.
"Үткәнеңне белү кирәк!" - дия йөрәк...
Тарих битендәге ак таплар да
Ачыклана хәзер. Ныклы безнең хәтер!

Хәтер көне якынлашкан саен,
Йөрәк сыкрап елый, үткәннәрне уйлый,
Атласидай кыю ул-кызларың
Тарих кабат сыный, вакыт үзе саный.

Милләтеңә килгән сынауларны
Хәтереңдә сакла, онытма шул хакта,
Ата-бабаң канын койган җирдә
Татар исмен сакла, бирешмичә атла!

Мөбәширә ШӘРӘФЕТДИНОВА.
Бөгелмә шәһәре.