Татарстан Президенты иң яхшы 12 дәүләт хезмәткәренә диплом тапшырды

"Татарстанның иң яхшы дәүләт граждан хезмәте" конкурсында җиңүчеләргә акчалата премия бирелде.

(Казан, 25 ноябрь, «Татар-информ»). Татарстан Президенты Рөстәм Миңнеханов республиканың иң яхшы 12 дәүләт хезмәткәренә диплом һәм акчалата премия тапшырды. Бу хакта Татарстан Республикасы Президенты матбугат хезмәте хәбәр итә.

Татарстан Республикасы Хөкүмәте йортында бүген "Татарстанның иң яхшы дәүләт граждан хезмәте" конкурсында җиңүчеләрне бүләкләү тантанасы узды.

Республикада дүртенче тапкыр үткәрелгән конкурста министрлыклар һәм ведомстволар вәкилләре катнашты. Финалчылар үз проектларын уңышлы яклады. Киләчәктә аларны гамәлгә ашыра алачаклар.