Россия Медицина фәннәре академиясе академигы табиблар белән катлаулы клиник очраклар хакында фикер алышты һәм пациентларга консультация бирде.
(Казан, 29 гыйнвар, «Татар-информ»). Кардиохирург, Россия Медицина фәннәре академиясе академигы һәм ТР Фәннәр академиясенең мактаулы әгъзасы Ренат Акчурин Казандагы Төбәкара клиника-диагностика үзәгенә сәфәре вакытында Татарстан һәм Мәскәүдәге дәвалау сыйфатын чагыштырды.
«Шуны ышанып әйтә алам: Татарстанда дәвалау сыйфаты Мәскәүдәгедән бер ягы белән дә аерылмый. Мәскәү һәм Татарстандагы табибларның хезмәт хаклары арасында берникадәр аерма бар, әлбәттә. Әмма бу мәсьәләне бездән башка гына хәл итәрләр дип өметләнәм», - диде Ренат Акчурин.
Төбәкара клиника-диагностика үзәгендә профессор клиника кардиохирурглары консилиумында катнашты. Белгечләр үзәк пациентлары белән бәйле катлаулы очраклар хакында фикер алышты. Акчурин шулай ук клиника пациентларына консультация бирде.
http://tatar-inform.tatar/news/2018/01/29/156960/