Күрше Әлмәт районында “COVID-19” белән зарарлануның тагын бер очрагы ачыкланган

   ТР Президенты матбугат хезмәте җитәкчесе Лилия Галимова хәбәр иткәнчә, бүгенге көндә Татарстан буенча “Covid-19” коронавирусы белән авыручы 75 яңа кеше ачыкланган. Шуларның 1се – читтән кертелгән, 74е – элемтәләр нәтиҗәсе. 24 кеше хастаханәгә салынган, 51 кеше өйдә дәвалана (аларда – җиңел яки симптомсыз форма).

Тәүлек эчендә иң күп чирне Казан халкы йоктырган – 24 кеше, икенче урында Яр Чаллы – 23 очрак. Өченче урында Түбән Кама районы – анда 7 “Covid-19” очрагы ачыкланган.

     Татарстанда “COVID-19”дан пациент үлеменең унынчы очрагы теркәлгән.

20 майда Казан шәһәрендә 1963 елда туган кеше вафат була. Температура күтәрелүдән һәм хәлсезлектән зарланып, табибларга мөрәҗәгать итә, аны хастаханәгә салалар. 13 майдан башлап, яңа коронавирус инфекциясенең авыр формасы булган ул гражданин йогышлы авырулар госпиталенең реанимация һәм интенсив терапия бүлегендә дәвалана. Шулай ук көчле миелобластлы лейкоз, авыр дәрәҗә тромбоцитопания, йөрәк-кан тамырлары һәм сулыш җитмәү авырулары булган. Диагноз экспертиза белән расланган. Туганнары һәм якыннарының кайгысын уртаклашабыз.

Хөрмәтле бөгелмәлеләр! Иминлек хакына, саклану чараларын ныклап үтәгез! Өйдән чыкканда медицина битлеген һәм пирчәткәләр киегез. Өйгә кайткач, битегезне һәм кулларыгызны җентекләп юыгыз, антисептик чаралар белән эшкәртегез. Үзегезне һәм якыннарыгызны саклагыз. Сезнең сәламәтлек – сезнең кулларда.