Бер күрешү – үзе бер гомер

Руслан ҖӘЛӘЕВ.
Автор фотосы.

Әлеге очрашуга төрле елларда 3 нче мәктәпне тәмамлаучылар чакырулы иде. Үз вакытында татар мәктәбе булганлыктан, аны тәмамлаучылар - бүгенге көндә инде өлкән яшьтәге апаларыбыз, абыйларыбыз - барысы да матур итеп милли киемнәребездән: бабайлар - түбәтәйләрдән, әбиләребез ак яулыклардан килгән иде. Шунысын да әйтергә ки­рәк, Бөгелмәнең татар мәк­тәбе даны күрше-тирә районнарда нык таралган була, шуңа күрә килеп укучылар да күп булган. Шул уңайдан очрашуда катнашкан, озак еллар буе /1960-1998 елларда/ мәктәп директоры булып эшләгән Фәрит Гали улы Нуриәхмәтов сөйләве мавыктыргыч булды: "Бер уку елында мәктәптә 1680 (!) бала белем алды, беренче сыйныфка 280 укучы /7 параллель сыйныф/ килде. Аларны тәрбия-укыту процессында 78 мө­­­­галлим-мөгаллимә кат­­нашты. Чагыштыру өчен, СССР күләмендә Украи­на­­­ның иң танылган мәк­тәп­­­­ләренең берсендә җәм­­­­гысе 300гә якын гына укучы бар иде. Мәктәпкә килгән кунаклар: "Фәрит, синең монда Кытай бит! - дип шаккаталар иде. Әйе, шулай күләмле эшләдек. Иң әһәмиятлесе, әлеге күләм сыйфатка зыян ки­термәде, мәктәбебезне тәмамлаучылар арасында күренекле шәхесләрнең күп булуы, һәрхәлдә, җәм­гыятьтә үз урыннарын табулары бик әһәмиятле хәл", - диде ул. Аның фикерен Сөмбел апа Гәрәе­ва дәвам итте: "Милли ка­һарманыбыз Газинур Га­фиятуллинның өч баласы да шушы мәктәптә укыганнар. Ул чорларны бүген дә бик сагынып искә алалар. Аннан соң Габд­рахман Әпсәләмовның мәктәпкә килүен дә яхшы хәтерлиләр. Күренекле язучыбыз атаклы "Газинур" романын язар алдыннан, шәһәр һәм районыбызда булып, тиешле документлар белән танышкан, китабы өчен материаллар туп­лаган".

Чәчкә апа Сәлимова исә тормыш юлына аяк басканда, төпле белем биргәннәре, җәмгыятькә кирәкле шәхесләр итеп тәрбияләгәннәре өчен укытучы-остазларына рәх­­мәтләрен әйтте. Оч­­ра­­­­шуга килгәннәрнең һәр­­­­­­кайсы нинди дә булса кызыклы вакыйга ту­рын­да сөйләде, янәшә­сендәгеләр белән уртак­лашты.

Очрашуда илгә җиңү яулауда катнашкан Бөек Ватан сугышы ветераннары да бар иде. Алар әле күптән түгел генә билгеләп үтелгән 9 Май - Җиңү көне турында фикерләрен бел­­­дерделәр. Әлеге чара­га Җиңү бәйрәменең дә­вамы буларак та бәя бирделәр. Шәһәребез ветераннар советы президиумы вәкиле Хәмит Шафиков исә күп кенә чыгышларны йомгаклап, очрашуга төгәл бәя бирде. Аның: "Бер күрешү - үзе бер гомер", - дигән сүзләре чараның асылын ачып бирде.

Ихлас очрашу төрле фикер алышулар: милләт, татар теле һәм ислам дине турында сөйләшүләр, бәхәсләр белән дә барды.

Чара ахырында әлеге күркәм очрашуны оештырган өчен шәһәребездә эшләүче "Ак калфак" оешмасы рәисе Сөмбел Гәрәевага, ул җитәкләгән оешма вәкилләренә, 3 нче мәктәп директоры Галина Дуловага, татар теле һәм әдәбияты укытучыларына кичәдә өлкәннәргә күрсәткән хөр­мәтләре, ихтирамнары өчен рәхмәт сүзләре әйтелде. Ветераннары­быз якты хатирәләр, уңай тәэсирләр белән өй­лә­ре­нә таралышты.