Хатын-кызлар арасында Россиякүләм Коръән укучылар бәйгесенә гаризалар кабул ителә
Бәйге 2020 елның 25 гыйнварында Ютазы районы Урыссу бистәсендә үткәреләчәк.
Хатын-кызлар арасында Россиякүләм Коръән укучылар бәйгесенә гаризалар кабул ителә башлады. Бу хакта ТР Диния нәзарәте матбугат хезмәте хәбәр итә.
Бәйге 2020 елның 25 гыйнварында Ютазы районы Урыссу бистәсендә үткәреләчәк.
Әлеге конкурсны үткәрүнең максаты – мөслимәләрне хакыйкый Ислам дин гыйлеме алырга чакыру, шулай ук Коръән буенча белемнәрне арттыру һәм киләчәктә дә Кәлам Шәрифне яттан өйрәнүгә омтылышларын үстерү.
Коръән укучылар бәйгесендә катнашу өчен, гүзәл затларның яше чикләнмәгән. Төп шарт – туташлар һәм ханымнар Коръән хафизлар әзерләү яки Коръән ятлау үзәге шәкерте булмаска тиеш.
Конкурс ике номинациядә уздырыла: Коръәннең өч җүзен (28, 29, 30) белү һәм Коръәннең дүрт (27, 28, 29, 30) җүзен белү. Әлеге җүзләрне яттан укудан тыш, төп таләпләр булып мәхраҗ (авазларны дөрес әйтү) һәм тәҗвид (дөрес укый белү) кагыйдәләрен белү, Коръәнне аһәңле (матур тавыш белән) уку тора.
Хатын-кызлар арасында Россиякүләм Коръән укучылар конкурсы Татарстан мөфтияте, Көньяк-Көнчыгыш казыяте, Ютазы мөхтәсибәте һәм район хакимияте катнашында Урыссу бистәсендә беренче тапкыр уздырыла. Катнашу өчен гаризалар 2020 елның 15 гыйнварына кадәр aisha-ustaz@rambler.ru почтасына кабул ителә (түбәндә бирелгән анкетаны тутырып җибәрү кирәк).
«Татар-информ»
dumrt.ru
Следите за самым важным и интересным в Telegram-каналеТатмедиа
