Бөгелмәдә "Сәлам" рухият-әхлак курслары узды

Кышкы каникул чорында Бөгелмә шәһәре һәм Бөгелмә районы мөхтәсибәте балалар өчен "Сәлам" рухият-әхлак курслары оештырды. Алар шәһәрнең ике мәчетендә эшләде. Малайларны укыту-өйрәтү Бөгелмәнең Үзәк мәчетендә алып барылды. Каникул көннәрендә алар Коръәннән һәр мөселманның намазларында кирәк була торган сүрәләрне ятладылар. Төрле мәчетләрнең имамнары алар белән әхлак дәресләре үткәрде. 

Курста укулар тәмамлангач, малайлар арасында азан әйтү бәйгесе үтте. Җиңүчеләргә -- дипломнар, бүләкләр, ә бәйгедә катнашкан барлык балаларга сертификатлар тапшырылды.

Кыз балалар өчен курс "Ирхәм" мәчетендә эшләде. Алар биредә намаз уку тәртипләрен өйрәнделәр, "Әд-Духа" сүрәсен ятладылар. Курс мөгаллимәләре кызлар өчен төрле уеннар, бәйгеләр, мастер-класслар үткәрде.

Смена төгәлләнү хөрмәтенә барлык балалар да бүләкләр алдылар, "Буцефал" ат спорты клубына экскурсиягә бардылар. Бу чаралар барысына да бик ошады, алар алдагы каникулда да шулай очрашырга теләк белдерделәр.