Башкорт халкының мәдәнияте турында Татар мәдәнияте үзәгендә сөйләделәр

Туган телләр һәм халыклар бердәмлеге елы Балалар күршеләр белән таныша
Шәһәр мәктәпләренең беренче сыйныф укучыларына ут-күршеләребез -- башкорт халкының мәдәнияте һәм көнкүреш үзенчәлекләре турында сөйләделәр.
Бөгелмә Татар мәдәнияте үзәге хезмәткәрләре башкорт халкының милли торагы -- тирмә-юрта кордылар. Бу -- үзәгендә учак һәм шул турыда өстә төтен чыгу урыны булган түгәрәк йорт. Тирмә тирәли мендәрләр тезеп куелган, уртада ашъяулык җәелгән.
Торакның уң ягы хатын-кызларныкы булып саналган. Анда хуҗалык кирәк яраклары куела торган йокы бүлмәсе, кухня җиһазлары урнаштырылган, ә уртага якынрак өлешенә бала бишеге элеп куелган булган.
Сул як ирләр өлеше булып саналган, бер үк вакытта кунак кабул итү урыны да булып торган. Бу өлешнең стенасына ат дирбияләре, бәйрәмдә кия торган киемнәр эленгән, чигүле сөлгеләр белән бизәлгән. Юртадан чыгып китү юлына якынрак урында җәя белән ук, кинжал, кылыч эленгән.
Балалар башкорт халкының милли киемнәрен, аларга гына хас булган кухня җиһазларын карадылар. Кунакларга шулай ук милли җырлар җырлап, биюләр биеп күрсәттеләр.