Мәңге бергә булыйк, Табигать!

Борчылуым булса,
әллә ничек
Тынычландырасың
син кабат.
Юатасың мине,
елатасың мине,
Җырлатасың мине,
Табигать.

Сафлык синдә.
Синдә уйдырма юк.
Синдә барсы чын,
бу - хакыйкать.
Син - иманым минем,
Син - имамым минем,
Син - кыйблам минем,
Табигать.

Нидә синең
тылсымлы серләрең?
Кайдан килә сиңа бу куәт?
Ныгытасың мине,
нык тотасың мине
Кочагыңда,
Анам - Табигать.

Яннарыңа
сагыш алып килсәм,
Тамырыннан аны
йолкып ат.
Син - сердәшем минем,
Хәбәрдәшем минем,
Сәфәрдәшем минем,
Табигать.

Гел матурлык эзлик,
Араларны өзмик:
Бердәмлектә игелек,
бәрәкәт.
Ераклашмыйк әле,
Саубуллашмыйк әле,
Бергә булыйк мәңге,
Табигать!
Фәһимә АБЗАЛОВА.
Бөгелмә шәһәре.