Мари Иле филармониясе һәм капелласы солистлары “Җиңү көне”н туган телдә башкардылар.

Марий Иле Республикасы Идел буе федераль округы төбәкләрендә яшәүчеләрне бердәм коллективка берләштерүче “Безнең Җиңү көне” масштаблы халык акциясенә кушылды. Акцияне РФ Президентының Идел буе федераль округындагы тулы вәкаләтле вәкиле аппараты башлап җибәрде, дип хәбәр итә оештыручылар. 
“Җиңү көне” җырын Яков Эшпай исемендәге Мари дәүләт филармониясенең, шулай ук “Марий кундем” халык уен кораллары оркестрына кушылып,  А.И. Искәндәров исемендәге Мари дәүләт хор капелласының әйдәп баручы солистлары туган телдә башкардылар. 
Ролик үз-үзеңне изоляцияләү режимы кертелгәнче үк язылган. Артистлар фон сыйфатында Марий Иле башкаласында мәдәният һәм ял паркын, С.Г. Чавайн бульварын, Билгесез солдатка монументны сайлаганнар, анда Бөек Ватан сугышы геройларына һәм тыл хезмәтчәннәренә багышланган Дан аллеясы, М. Кокшагый елгасы яр буе һәм Благовещенск манарасы каршындагы мәйданчык та күренә. 
 

– “Җиңү көне” җырын мари телендә башкару тәкъдиме килгәч, ни өчен  без аны милли телдә җырларга тиеш дигән сорау тумады да. Безнең гади мари авылларыннан килгән бабаларыбыз нәкъ менә үз туган телләрендә сөйләшеп, җиңү яулап, төрле республикалардан килгән башка туганнар белән бергә җиңүгә ирештеләр", – дип сөйләде капелла солисты Светлана Яндукова. 
 

Җиңү символына әверелгән җырны башкару турындагы видеоролик рус һәм мари телләрендә трансляцияләнәчәк, шулай ук #ФлешмобНашДеньПобеды, #ПесниПобедыПФО #НашДеньПобеды хештеглары астында популяр социаль челтәрләрдә урнаштырылачак.  
 

Элегрәк «Татар-информ» мәгълүмат агентлыгы Мордовиядә 9 майга багышланган “Җиңү көне”н рус, мукшы һәм эрзя телләрендә җырлауларын хәбәр иткән иде.