Бөгелмәлеләрне үз-үзеңне изоляцияләү режимын бозган өчен штрафка тартачаклар.

Татарстанда җитди сәбәпсез үз-үзеңне изоляцияләү режимын бозган гражданнар өчен штрафлар кулланылачак. Бу хакта  ТР Хөкүмәте Йортында узган брифингта Кулланучылар хокукларын яклау һәм кеше иминлеге өлкәсендә күзәтчелек буенча федераль хезмәтнең ТР буенча идарәсе җитәкчесе Марина Патяшина хәбәр итте. 
«Эчке эшләр министрлыгы хезмәткәрләренең “Роспотребнадзор” идарәсе хезмәткәрләре белән берлектә рейдлары оештырылачак. Алар гражданнарны үз-үзеңне изоляцияләү таләпләрен тикшерү өчен туктатачаклар. Әгәр дә аның урамга чыгу ихтыяҗының җитди икәнлеге расланса, бу гражданинга сораулар булмаячак", - диде Патяшина. 
Әгәр кешенең өйдән чыгу сәбәбе ачык булмаса, административ җәза чаралары күреләчәк. Карантин режимын бозган өчен штраф 100 сумнан 500 сумга кадәр тәшкил итәчәк. 
"Якын арада һәр штраф буенча башка суммалар кабул ителәчәк. Без физик һәм юридик затлар өчен штрафларның үз-үзеңне изоляцияләү режимын бозган өчен берничә тапкыр күбрәк булачагын күрәчәкбез»,-дип өстәде ТР Премьер-министры урынбасары Ләйлә Фазлыева. 
"Үз-үзеңне изоляцияләү режимын бозучының гамәлләре зарарлану яки кешеләрнең үлеменә китерсә, җинаять җаваплылыгы башлана",-дип билгеләп үтте ТР Премьер-министры урынбасары.